福禄轩D味道真系........

蜜雪儿 · 发表于 2007-4-5 16:10

前晚经过福禄轩（原美上美位置），见都系做甜品喔，唔知味道点呢，于是入去试下啦
点知，味道出乎我地想象，虽然美上美并唔算特别好，但呢间店同美记差好远喔
最搞笑就系个老细，我地开始点左蛋煎棕、煎饺、生菜炒河粉，距记一次问几次，记完呢样又唔记得另外果样
好啦，点完啦，等N耐，上左碟煎饺，口感一般；跟住到炒河粉，斋到无人有，连条生菜丝都唔见，淡到口都寡埋
最后系蛋煎棕，系方型既，蛋同棕好分明，味道都系嘛嘛，唔够香
食到好颈渴，啉住叫碗椰奶西米露润下喉，叫个服务员过来，距都唔明我地讲乜，晕，原来系外省既朋友
算，叫果个老细过来落单，距今次都算醒目，好快记得……不过D西米露好稀，得个甜，无乜味
后来仲有D搞笑野啊，有客人叫埋单，个老细逐样睇住台面既食物来计数，仲问返人地转头食左D乜，D野几钱……客人就好出奇啦：“我点知几钱啊”，搞到个老细挠晒头甘，哎……我地坐系隔离真系好想笑啊，做老细既居然问顾客D食物几钱，真系晕得一阵阵……
不过可能间店新开既，距自己都唔太清楚D价钱呱……店内环境一般，我就唔多中意D白光管啦，地面又唔多干净喔，无乜胃口啊

[ 本帖最后由蜜雪儿于 2007-4-5 16:11 编辑 ]