【真人真事】女人無論幾愛一個男人都好都要識得保護自己

WEI[爱心] · 发表于 2017-10-31 11:51

我今年23歲就快24。前男友大我一年，我地一齊左四年幾，早排分開左。我係當年19歲返part time識到佢我追佢返黎，個陣仲細無諗到咁長遠，覺得同呢個男仔一齊好開心無憂無慮咁就夠晒啦！

諗返起，佢金牛座好細心好錫我，頭兩三年一齊真係好開心，認定將來會同佢結婚，諗到好長遠。就係一齊左兩年半左右佢無工返手停口停話要問銀行借錢，咁我作為佢身邊既女人，當然唔忍心睇住佢死就主動話：你問銀行借不如我借比你啦唔收利息你有能力再還！

就係咁借左五位數，而佢就拎左呢舊錢去應急，後尾未有工返時又買左架2手寶馬，之後個兩年份份工都係返返下唔返佢有佢自己理由（或者而家我諗返起叫做藉口），無一份做多過三個月。咁當然，工接工中間啲日子當然都係無錢，但佢就揹住一架私家車一架電單車既開支，我亦都好願意去幫佢，陪佢渡過難關，因為我信捱過左呢段日子佢會生性佢會努力，啲錢就不斷咁借比佢個陣已經去到六位數。。。自問一個女人仔個陣21 22歲，我諗返都覺得自己好了不起，自己慳到買咩都諗過度過，朋友旅行我都唔會去，同前男友一齊就餐餐茶餐廳我唔會要求食咩香港女生好鐘意去打卡個啲靚靚餐廳或者買咩飾物唔實用既東西，佢有話過買但我拒絕左，個陣覺得無所謂我真係唔在乎物質上滿足，或者我要個陣我就靠自己買。個陣淨係想一齊草起啲錢佢捱過呢段低潮就無事。。。。。。。。。

講返其實我學歷得asso 唔係高叫做而家份工穩穩定定，佢就得中五，我屋企人曾經提過佢不如襯後生進修下啦，但事實上無人知佢爭緊我六位數既錢，好多野唔係話做就做。。。而我身邊啲同學朋友開始畢業，出到黎做老師/紀律部隊等等穩定職業。我就更加覺得同前男友有個差距，我唔係介意佢職業/人工（佢都有2萬但份份做幾個月就走），而係覺得我見唔到佢上進努力，見唔到佢腳踏實地，連最基本返足工都做唔到，成日射波就話想見我想同我玩。再加埋平時受受埋埋唔少委屈真係好想離開佢，就當我放過自己，佢都放過我。委屈包括：揸電單車出街塞車一落車除頭盔個刻就搵我出氣/比人抄牌就會話我把衰口講中晒/教導佢唔係必須品就唔好買啦提下佢你仲爭緊我錢結果佢會大發雷霆。

到左最近佢同屋企人有爭執佢就一定要自己搬出黎住，今次我真係好唔願意咁借錢幫佢，因為我feel到自己到左極限，壓力好大，知道自己唔可能永無止境咁幫佢不論經濟上還是其他精神上支持，我就同自己講借埋最後今次。。。。。佢間屋係我搵裡面大大小小既野大部分都係我收工放假幫佢買，我真係好攰好攰。。。。

最後我提出左分手，講左其實唔係介意佢無錢，只係覺得喺埋一齊我睇唔到將來，我唔想全世界進步緊時佢仲原地踏步，女人時間青春有限，再者我真係成副身家拎晒出黎幫佢（或者叫做養佢），我係好唔捨得，但無辦法繼續留喺佢身邊，當佢每月還五千還清晒都要30個月時間，到時我已經就快27歲，唔可能等佢到時重頭草錢到時先計劃將來。。。所以我選擇離開。。。。。

我都知佢好唔捨得我，但佢一口咬定我嫌佢窮我貪錢先走，我真係好難過如果真係因為錢當年佢窮我早就走左，唔會喺佢身邊留到今時今日，自己慳慳埋埋比晒最好既野佢。。。連佢身邊啲女仔朋友都係咁怪責我貪錢，個一刻真係覺得無人明白我，但我唔可以心軟返轉頭。。。

呢4年幾，我既世界真係得返我男友，屋企人/朋友/舊同學/舊同事約會，可以推我都推晒，因為我想將我啲時間心機花晒喺佢身上。。。。到左呢一刻我搵返朋友，佢地無離棄我仲支持我安慰我，我都好內疚，好後悔以前將男友睇得咁重，放棄左全世界。。。。

打左成個鐘，唔係想博咩同情，只係想提醒大家，真係..........無論幾愛一個男人都好，唔好將自己既全部/全副心思精神放晒落去，真係未必有回報，到最後受傷既真係自己。。。。。。。