鄭中基、阿 Sa落淚宣佈離婚

K歌之王1314

【本報訊】藝人鄭中基（ Ronald）與蔡卓妍（阿 Sa） 06年秘密結婚，兩人一直否認，直至本報昨日獨家刊登兩人在美國註冊的結婚證書，兩夫妻終召開記者會，公開承認配偶關係，但兩人卻同時宣佈離婚。淚水失控的七分鐘自白當中，鄭中基兩度形容婚姻生活「非常之咁開心」，然後因了解而分開。最近才高調宣佈與 Ronald分手的阿 Sa，則以私隱為理由，沒有解釋為何隱瞞婚訊多年。記者：胡苑君、蔡元貴
不許記者提問的記者會，昨日黃昏在九龍灣展貿中心舉行，逾百記者一早來到等候。架着深色眼鏡、穿深色外套的鄭中基，面容憔悴。身邊的阿 Sa略為精神一點，合照時也偶爾展示微笑，不像她那木無表情的丈夫。二人卻仍然很有夫妻相，記者會上有時會凝視對方

鄭中基說到與蔡卓妍正申請離婚時，忍不住感觸落淚

蔡卓妍談及與鄭中基關係時，亦不禁拭淚
「希望成為永遠嘅好朋友」
「結婚係一個事實。」鄭中基把貓紙放在桌上，宣佈這個流傳了四年多、也迴避了四年多的事實。他說：「 06年我哋兩個非常之咁開心，做咗呢個決定，而亦都得到雙方家長嘅支持下，我哋喺洛杉磯註冊結婚。」他這樣解釋秘密結婚的理由：「一路以來，我同阿 Sa對於我哋嘅感情，同埋結婚嘅態度，我哋都覺得係我哋兩個私人嘅事，亦都唔需要，亦都冇必要同大家公開。」
婚事是神秘的，婚姻是快活的。鄭說：「喺結婚呢幾年，我哋生活同埋大家都係非常之咁開心。」但他續說：「而經過呢一段時間，大家嘅共同成長，同埋對彼此雙方有更加深入嘅了解，發覺我哋分手係對大家日後比較好啲。所以，最近我哋同大家宣佈我哋分開，亦都係一個好理性嘅情況下，做出一個咁嘅決定。而呢個決定，亦都係一個事實。」
公開了婚訊之後，鄭中基一併交代了離婚消息：「我好相信，離婚係跟住大家落嚟會追問嘅問題。呢件事我哋已經處理緊，而所有一切法律程序要做嘅嘢，我哋亦都會做。」這時候， Ronald低頭數秒，強忍淚水，阿 Sa輕拍他的大腿，然後遞上紙巾。
「儘管……我哋唔能夠成為夫妻，但係我哋的而且確有過一段好開心嘅時間。更加……希望我哋可以成為永遠嘅好朋友。」說到此處， Ronald有點崩潰，兩度除下眼鏡，拭抹眼淚。鄭太阿 Sa則多次望向丈夫，現場咪高峯傳出阿 Sa用力索鼻水的聲音。

接下來，沒有貓紙的阿 Sa，以略帶哀傷的語調發表她的宣言：「其實一直以來同 Ronald拍拖到結婚到家分開咗，大家都係有共識地去做每一樣嘅決定，同埋都係我哋兩個人嘅選擇。所以一路以來，我哋都覺得，呢一樣係我哋兩個人嘅事情，所以冇選擇去同大家交代。」
事實上，鄭氏夫婦一直以來不僅沒有公開婚訊，更多次在傳媒追問下否認真相。阿 Sa昨日這樣辯白：「因為覺得呢啲係我哋嘅私事，好想呢個成為我哋小小嘅秘密。一路以來，其實都以為，雖然我哋係藝人，但係都可以有屬於我哋自己嘅私隱。」

「已經對好多人造成傷害」
這時阿 Sa表現得有點激動：「但係原來……原來係藝人唔可以存在有私隱嘅。」阿 Sa聲音哽咽，需要 Ronald用手輕拍其大腿安撫。她續說：「一路以來唔選擇去公開，係因為我哋都達成一個共識，係希望可以保護大家兩個嘅關係同埋我哋嘅屋企人。到家，已經對好多人造成一個傷害，亦都唔希望會接住落嚟係有接踵而來嘅傷害，所以今日就同大家一齊去交代呢一件事。」
二人說話合共不足七分鐘，阿 Sa說完，二人即離座，讓記者再多拍幾張合照後，匆匆散場。
Sa基婚事是昨日城中熱話，壟斷各大討論區留言，有人認為結婚是私事，毋須公開，也有人認為藝人身為公眾人物，需要有誠信。

畢竟曾經相愛，在記者會尾聲時，鄭中基輕撫蔡卓妍，以示安慰。


香港蘋果日報昨日刊登鄭、蔡在美國洛杉磯秘密註冊結婚的婚書，兩人於傍晚即戲劇性宣佈離婚。